भित्ताको मात्र नभई राष्ट्रकै राष्ट्रपति भईसकेको प्रचण्डको दाबी

माओवादी अध्यक्ष प्रचण्डले संविधानसभाको निर्वाचन संसदीय निर्वाचन जस्तै भए मुलुकका लागि ठूलो दुर्घट्ना हुने बताउनुभएको छ ।

उदयपूर सदरमुकाम गाईघाटमा आज पार्टीको आमसभामा बोल्दै प्रचण्डले मुलुकलाई दुर्भाग्यबाट बचाउन प्रतिगामीहरुलाई परास्त गर्नुपर्ने बताउनुभयो । प्रचण्डले ठूला नेताहरुको हत्या गर्ने षडयन्त्र भईरहेको जनाउँदै त्यसैको उपज रोल्पा र कपिलवस्तुमा पार्टी कार्यकर्ताको हत्या भएको दाबी गर्नुभयो । उहाँले आफ्नो कार्यकर्ता मारिदा सरकार मुकदर्शक बनेको आरोप लगाउनुभयो । षडयन्त्रकारीले आफ्नो हत्या गर्ने जाल बुनिरहेको भन्दै प्रचण्डले यस विषयमा आजै प्रधानमन्त्रीलाई समेत जानकारी गराएको बताउनुभयो ।

संविधानसभाको माध्यमबाट मुलुकमा यूगान्तकारी परिवर्तन हुन लागेकाले आफू भित्ताको मात्र नभई राष्ट्रकै राष्ट्रपति भईसकेको प्रचण्डले दाबी गर्नुभयो । उहाँले भन्नुभयो –“नेपाली जनताले मलाई राट्रपति चुनीसकेका छन् र आफ्नो हृदयमा समेत राखिसकेका छन् ।“

आफुले पटक-पटक वाम एकताका लागि पहल गरे पनि अमेरिकाको दबाबमा एमालेले खुट्टा कमाएको प्रचण्डले आरोप लगाउनुभयो । आज बिहान प्रधानमन्त्री गिरिजा प्रसाद कोईरालासँगको भेटवार्ता सकेर प्रचण्ड गाईघाट पुग्नुभएको हो ।