शान्तिपूर्ण चुनावका लागि बाधाहरु बाँकी: निर्वाचन आयोग

शान्तिपूर्ण चुनावका लागि बाधाहरु बाँकी: निर्वाचन आयोग

चैत २८ गतेका लागि तोकिएको संविधानसभाको चुनाव स्वच्छ र शान्तिपूर्ण बनाउन अझै केही गम्भीर चुनौतीहरु देशमा बिद्यमान रहेको निर्वाचन आयोगले जनाएको छ।
प्रधानमन्त्रीले शान्तिपूर्ण ढंगबाट निर्वाचन सम्पन्न गर्न कुनै कसर बाँकी नराख्ने कुरा बताएका छन्
आइतबार आयोगका अधिकारीहरुले शान्ति सुरक्षाको स्थितिदेखि दलहरुबीच भाईचारा र संयमताका साथै बिजुली र ईन्धन जस्ता अत्यावश्यक कुराहरुको सुनिश्चितताका लागि प्रधानमन्त्री गिरिजाप्रसाद कोइरालाको ध्यानाकर्षण गराएका थिए।
संयम
निर्वाचन आयुक्तहरुको एउटा टोलीले आइतबार प्रधानमन्त्री समक्ष चुनौतीहरुको एउटा लामो सूची नै पेस गरेको थियो।
शान्तिसुरक्षा, बन्द हडताल र भौगोलीक चुनौतीहरु त छँदै थिए, आयोगका विचारमा अब चुनाव प्रचारप्रसारका दौरान दलहरुबीच संयम नदेखिनु नयाँ चुनौती बनेको छ।
प्रधानमन्त्रीसंगको भेटमा उपस्थित एकजना आयुक्त, नीलकण्ठ उप्रेतीले बीबीसीसंग भने “अब दलहरु संयमीत भएर चुनाव प्रचारप्रसारमा लाग्नु पर्छ। तर त्यसो हुन नसकीरहेकोमा हामीले प्रधानमन्त्रीलाई भन्यौं।”
आयोगका अनुसार अहिले विगतको तुलनामा सुरक्षास्थितिमा सुधार देखिए पनि तराई लगायतका स्थानमा देखिएका सुरक्षा चुनौतीहरुको समाधान गर्न आवश्यक भएको छ।
आपराधिक क्रियाकलाप गर्नेहरु माथि तत्काल कारवाही गर्नुपर्ने र पेट्रोलियम पदार्थ लगायतका अत्यावश्यक बस्तुको जोहो गर्नुपर्ने माग आयुक्तहरुले प्रधानमन्त्री समक्ष गरेका थिए।
दैनिक सात घण्टा लोड्सेडिङ भइरहेका बेला, चुनाव र मतगणनाको समयमा लोडसेडिङ हटाउनुपर्ने माग समेत आयोगले गरेको छ।
निष्पक्ष
निर्वाचन आचारसंहिताको उलंघन भइरहेका खबरहरुबीच आयोगले सरकारी संचार माध्यमहरु निष्पक्ष हुनुपर्ने माग पनि दोहोर्‍याएको छ।
प्रधानमन्त्री समक्ष आयुक्तहरुले कर्मचारी अपुग भएका जिल्लाहरुमा अन्यत्रबाट पठाउन समेत आग्रह गरेका छन्।
आयुक्तहरुका कुरा सुनेपछि कोइरालाले, गम्भीरतापूर्वक शान्तिपूर्ण ढंगबाट स्वच्छ निर्वाचन सम्पन्न गर्न सरकारले कुनै कसर बाँकी नराख्ने प्रतिबद्धता जनाएको आयोगले बताएको छ।
काठमाण्डूस्थित बीबीसीका संवाददाता भन्छन्-प्रधानमन्त्रीले सबै बिघ्नबाधा पन्छाउन कुनै कसर बाँकी नराख्ने आश्वासन दिए पनि चुनावको बाटोमा चुनौतीहरु कायमै रहेको देखिन्छ।